Kampoppsett for turneringa er lagt ut på Profixio. Følg med på eventuelle endringar som kan koma heilt fram til cupdagen. I år er det 76 lag med jenter og gutar i klassane 9 til 12år. Nytt i år er at me testar ut dagscup på sundagen kl 10:00-13:30 for alder 6-8 år, dei spelar på Voss ungdomsskule. Hovudturneringa vert gjennomført i Voss idrottshall (hallen) og på Voss Gymnas. Kampane vert spela fredag frå kl 16:30 – 21:50, laurdag kl 07:30 – 20:50 og sundag kl 07:30 – 14:30. Under Voss Handballcup utdannar me eigne dommarar. Me oppmodar om at trenarar, lagleiarar og foreldre tek omsyn til dette under kampane.
Det er tett program og difor viktig at alle møter i god tid til kampar for å unngå forseinkingar.
Hugs å starta turneringa med å sjekka inn i Voss idrottshall.
Overnatting vert på Voss ungdomsskule og Voss Gymnas. All matservering i regi av cupen vil skje på Voss Gymnas. Det er IKKJE parkering ved Voss Ungdomsskule. Det er offentleg parkering fleire stader i sentrum, i Voss Parkeringshus (Vossapark), ved Voss gymnas og Voss idrottshall. Det er ei god løysing å reisa til cupen med tog eller buss til Voss. Kart over området finn de lengre nede i dokumentet.
FORSVARSREGEL:
For klassane 2015-2013 (9-11 år) gjeld forsvarsregel i vedlegg 3, alt forsvarsspel skal vera ball- og ballbaneorientert.
FYRSTEHJELP:
Alle lag må ta med seg tape og isposar sjølve.
AVFALLSSORTERING:
I 2025 vil Voss handballklubb i samarbeid med Ragn-Sells sortera avfallet med produserar på vår cup for eit bedre fotavtrykk og eit betre miljø, takk for at du sorterar ditt avfall. Me sorterar i 4 fraksjonar, restavfall, plast, papp og matavfall. Sjå meir info i vedlegg 2.
BETALING:
All betaling skjer gjennom Profixio. Dersom de har problem, send e-post til
[email protected] Alle med deltakarkort har gratis inngang i hallen, medan alle andre må betale inngang i hallen.
INNSJEKK:
All registrering/ innsjekk skjer i sekretariatet i Voss idrettshall. Der vil de få informasjon om overnatting, og me deler ut deltakarkort og premiar lagvis. Same stad må de avtala tidspunkt for bading i Vossabadet for dei som har bestilt dette gjennom Profixio (sjå meir info i neste punkt). Me opnar for registrering i hallen kl 15:30 fredag, og ein kan sjekke inn på skulane frå kl 17:00 fredag. Det vil vera sekretariat i gangen i hallen under heile turneringa. Dei vil hjelpa med spørsmål kring turneringa.
BADING:
Me tilbyr også bading i Vossabadet i år. For at Vossabadet skal ha kontroll på kor mange som badar samstundes,
må de skriva dykk på lister i cup-sekretariatet i hallen, og IKKJE møta opp direkte i Vossabadet. De får 1 gratis besøk i badet på deltakarkortet. Dersom de ynskjer fleire turar må de betala for det sjølve.
Reglar: Vossabadet krev at det er 1 vaksen pr 3 barn, desse vaksne går inn gratis. Dei «gratis vaksne» må ha på badeklede og vera i bassenget. Dei vaksne har ansvar for at
deira gruppa dusjar nakne før bading, er effektive i garderoben og held badetida, slik at alle får nytta si badetid. Dersom det er fleire vaksne som vil vera med og bada, må dei betala vanleg pris ved inngang. Laget har sjølv ansvar for å stilla med nok vaksne. Spelarar som er fylt 12 år, og kan symja, kan bada aleine. Meir info:
https://vossabadet.no/badereglar/
DISKOTEK:
Laurdag kveld kl 19:30-22:00 er det diskotek i Vangsgryto (kart lengre nede). Kvart lag må ha med ansvarlege vaksne.
OVERNATTING:
Overnatting er inkludert for dei som har kjøpt B - kort. Det vert overnatting i klasserom ved Voss Ungdomsskule og Voss Gymnas. Det er berre lov med enkle oppblåsbare madrasser, elles vert det ikkje plass til alle i klasseromma. Fordeling mellom skulane skjer på bakgrunn av plassbehov. Det er ikkje lov å laga mat på skulane, eller nyta alkohol eller andre rusmiddel. Det vil vera kontinuerleg vakthald på alle overnattingsstadane. Ytterdøra vert låst når siste kamp er ferdig, vaktene sit ved/nær inngangsdøra. Utsjekk frå rom skal skje seinast sundag klokka 11:00. Klasseromma skal vera rydda og pultane skal på plass før avreise. Ta bilete av klasserommet når de kjem, så veit de korleis pultane skal stå. Det er strengt forbode med bruk av ball inne på skulane.
MAT:
Alle med deltakarkort vil få servert middag laurdag (kl 15-18). Dei med B-kort vil i tillegg få servert frukost laurdag og sundag frå klokka 07 - 10. Det er mange som skal få servert frukost og middag, så det vert kø. For å redusera ventetida, er det fint om alle ryddar etter seg og går ut av kantina så fort dei har ete seg mette. Hugs å ta med deltakarkorta (armbånd) for kontroll. Det vil også vera kiosk/kafè i hallen. Der sel me frukt, nudlar, vafler, bollar, pølser, kaffi, brus, vatn og snop. Det vil det vera mogleg å kjøpa hamburger, pommes frites og pølse i mattelt utanfor Voss Idrottshall. For dei som vil handla mat sjølv er næraste butikk Kiwi i Uttrågata, som ligg 3 min gange frå Voss ungdomsskule, og 5-6 min frå Voss idrottshall. Den er open frå kl 7-23 fredag og laurdag. Om nokon har særskilte behov på matfronten, gje beskjed snarleg på
[email protected] .
Køyr forsiktig og velkomne til cup!
Med venleg helsing
Voss Handballklubb
VEDLEGG:
- Tidsskjema og kart
- Informasjon om avfallssortering
- Regel forsvarsspel
- Rabatt hjå våre samarbeidspartnarar
Vedlegg 1
VOSS HANDBALLCUP 2025
Kva skjer, kor tid og kor:
Kva | Kor tid | Kor
Innsjekk og utlev. av deltakarkort | Frå kl.15.30 (skulane er klare frå kl. 17.00) | I Cupsekretariatet i inngangen i Voss Idrottshall
Frukost laurdag | Kl. 07.00 – 10.00 | Kantina på Voss Gymnas
Middag laurdag | Kl. 15.00 - 18.00 | Kantina på Voss Gymnas
Bading | Fredag 18.30 - 21.00 Laurdag 11.00 – 18.00 Sundag 11.00 -18.00 | Vossabadet
Diskotek | Laurdag kl.19.30 – 22:00 | Vangsgryto i kjellaren i Sosialbygget
Frukost sundag | Kl. 07.00 – 10.00 | Voss Gymnas
Utsjekk | Sundag innan kl. 11.00 | Kontakt vaktane på overnattingsstaden
Kart over turneringsområdet
Vedlegg 2
Informasjon om avfallssortering
I samarbeid med Ragn-Sells sorterar me i desse 4 fraksjonane på Voss handballcup. Du gjer ein viktig jobb for miljøet med å hjelpa oss å halda cupen rein og ryddig.
